春滿四合院 - 春院墨寶 - 人生百態Ⅰ - 港佬狂想曲（十二）（粵語版）

sunray
貴賓
Rank: 6

UID 5427
精華 0
積分 684
帖子 89
閱讀權限 100
註冊 2006-10-13
來自 HK
狀態離線

港佬狂想曲（十二）（粵語版）

-------------------------------------
（港佬狂想曲）（粵語版）
作者：Sunray
-------------------------------------
十二、忘命天涯（本章無色）
-------------------------------------

　　（前文提要：雞雄嗒左Carol隻處女豬之後，送左佢返屋企。不過就要暫時
代為照顧Jacky，連買Ｍ巾呢Ｄ咁私人既野都要代勞……）

　　如是者足足過左個幾星期，Carol淨係打過兩次返黎搵Jacky，而且因為要避
開屋企人既監視，所以每次都係晌街度打，講左冇兩句就琴琴青收線。Jakcy等到
鬼死咁心急，但又唔敢打電話搵Carol喎……又過多幾日，Jacky終於忍唔住，夜
晚等雞雄一放工返到屋企就拉住雞雄，要佢陪佢落街打電話搵Carol。

　　「阿雄哥，我求下你，同我落街打電話啦！」Jacky好難得咁低聲下氣。

　　雞雄岩岩返到黎，知道出面落雨落到好似落狗屎咁，當堂冤起塊面：「阿Jacky
哥，我都求下妳啦，而家落到咁大雨，不如等Ｄ雨停左先啦……」

　　「唔得呀！」Jacky好似想喊咁：「我實在太掛住Carol喇……佢……佢已經
成個星期冇打過電話畀我喇……」

　　雞雄吞左啖口水，其實佢自己反而日日都有同Carol傾電話，今日晏晝Carol
先岩岩Call過雞雄，話已經諗清諗楚，都係唔捨得爹地媽咪，所以正考慮緊點樣
同Jacky講分手……Carol又話好掛住雞雄，好想見佢添，Ｄ語氣仲有些少怕怕醜
醜咁，引到雞雄幾乎要走入廁所打返次飛機。

　　不過見到Jakcy果副好似死左老豆咁既口面，雞雄當然唔敢同佢講啦。

　　「阿雄哥，我求下你丫！我真係好掛住Carol，好想聽下佢把聲呀……」講完
真係喊左出黎。

　　雞雄一見到女人Ｄ眼淚就冇哂辦法，就算果個係男人婆都一樣，唯有即刻舉
手投降：「好！好！我同妳去……唔該妳即刻收聲先啦……」

　　Jacky當堂開心到聲淚俱下，左一手眼淚，右一手鼻涕咁，捉實雞雄隻手猛咁
搖。

　　雞雄嘆左口氣，唯有死死地氣拎左兩把遮，陪左Jacky落街。佢地唔敢晌附近
打電話，只有冒住大雨行多兩條街口，搵左個公眾電話亭。Jacky即刻撲左入去，
好心急咁入錢打電話，仲緊張到連個大餅都跌左落地添……

　　果陣Ｄ雨落得鬼死咁大，雞雄就算擔住把遮一樣全身由頭濕到落腳。佢睇住
Jacky晌電話亭裡面講到好似好激動咁，心知Carol梗係講緊唔肯同佢走佬既事。
Jacky越講越激，一面講一面猛咁用拳頭打個電話亭塊玻璃，仲打到「砰砰」聲響。
雞雄又唔係擔心會畀Jacky打爛，因為果塊係不碎膠，佢擔心Jacky隻手多Ｄ……
因為佢見到Jacky個拳頭已經打到流哂血。

　　最後，佢聽到Jacky大聲咁嗌左兩聲：「Carol……」跟住就攬住個電話晌度
大聲喊……忽然間又發左狂咁衝左出黎，好似黐左線咁晌條街度亂走亂叫，又亂
咁踢街邊Ｄ路牌同垃圾桶，完全唔理自己成身都畀Ｄ雨淋到濕哂。

　　雞雄見佢癲成咁，都唔敢行埋去勸佢，只有任得Jacky癲左一陣……不過終於
都係唔忍心，衝上去想拉住佢。點知Jakcy癲起上黎，扯住雞雄就亂打亂踢，口裡
面大聲喊住話：「Carol唔要我……Carol唔要我……」雞雄中左佢幾野，雖然唔
係好痛，可過個心都嬲嬲地，於是又行埋一邊唔鬼啋佢。

　　只見Jacky發完一大輪癲之後，終於都靜返落黎，成碌木咁企晌路中心，任Ｄ
雨照頭淋……

-------------------------------------

　　雞雄陪住Jacky晌大雨中淋左大半粒鐘，真係又凍又餓，有幾次真係想丟低佢
一個人返屋企訓大覺；不過見到佢個咁既死款，心裡面又唔多忍心……始終係自己
撬走左人地條女丫嘛……而且佢又單身一個女仔，夜媽媽留低佢一個人晌條街度，
雞雄又唔放心。

　　到左最後，雞雄終於都頂唔順，放膽行埋去拍下Jakcy：「喂！男人婆，大丈
夫何患無妻丫，畀女撇之嘛，又唔係世界末日，駛死咩？」點知Jacky仲係企晌度
冇反應。雞雄就企埋去，搵把遮遮住佢，一面又話：「咁大雨，會淋病架，不如
返屋企先啦……」

　　Jacky依然一Ｄ反應都冇，於是雞雄都唔理得咁多，一手拖實佢就行。Jacky
成身濕哂，成個公仔咁，呆呆咁任得雞雄拖住行，不過一路行就一路震……仲一
路流馬尿……

　　雞雄睇到都有Ｄ唔忍心，於是又安慰佢話：「喂，女去女還在丫嘛，大丈夫
個患無妻喎，聽日溝過第二件咪得囉！」

　　Jacky終於有反應，佢怒啤左雞雄一眼，又喊住咁鬧佢：「我Ｄ野關你個你個
猥瑣佬也事呀？你識得乜野叫做愛咩？」

　　「識鬧我即係已經冇事啦！」雞雄一手遞返把遮畀Jacky自己擔，跟住又串返
佢話：「係喇！妳乜都叻哂！超！你估全世界得妳一個人談過戀愛？我阿雄粗人一
個，乜都唔識，當然冇妳咁識得『愛』人啦！我剩係知道愛一個人係要令佢開心幸
福，而唔係夾硬要將佢留晌身邊，甚至不惜傷害佢，令佢傷心……」

　　「乜野喎？Carol同我一齊都唔知幾開心呀！」Jacky即刻反駁。

　　「開心個屁！」雞雄一句鬧返過去：「佢根本就唔想同父母分開，你夾硬迫佢
同妳私奔，根本就係傷害緊佢！」

　　「我冇……」Jacky啞口無言咁。

　　「你有！」雞雄鬧開有癮，又繼續鬧Jacky：「妳自己唔鍾意男人就算啦，做
乜迫Carol陪妳搞基喎。佢好人好姐，好應該正正常常咁搵返個男仔談戀愛架！」

　　Jacky好嬲咁：「你歧視我！」

　　「係呀！我係歧視妳個死基婆呀！咁點丫？搵人拉我丫笨？」雞雄直認不諱：
「好好地一個女人唔去搵男人拍拖結婚大肚生仔，偏偏違背天理去同我地Ｄ男人爭
女，香港地已經冇乜靚女架啦，妳仲要黎同我地爭？分到薄哂，妳話唔係變態係乜
野？如果個個女仔都好似妳咁，唔駛等乜野地球暖化、２０１２，就已經世界末日
啦！妳呀……咪就係妳呢Ｄ人搞到人類滅亡架囉！」

　　嘩！咁大條罪名責落黎，Jacky都畀雞雄嚇左一跳，一時間竟然諗唔到藉口反
駁。

　　佢地兩個人一路鬧一路行，唔覺唔覺原來就快行到返屋企樓下。點知一轉到入
街口，Jacky即刻停低左腳步，仲一手拉住雞雄唔畀佢行：「咪行住，你睇下……」
跟手指住佢地樓下……

　　雞雄望過去，見到有兩架黑色大ＢＥＮＺ停左晌度。

　　「……係……係咪妳老豆Ｄ人呀？」雞雄一邊問，一邊縮返隻腳埋黎，兩個人
匿埋晌街角偷偷地望過去。

　　Jacky點左下頭：「係，我認得架車。」

　　「呀！係佢！」雞雄瞇起雙眼，佢都認得其中一個企晌車邊既男人……就係果
日晌長洲跟蹤佢同Carol果條西裝友。佢指一指畀Jacky睇，Jacky就話：「冇錯，佢
叫喪強，係我老豆Ｄ手下既頭馬。」

　　「咁而家點算？唔返得上去喇喎！」雞雄即刻苦埋口面。

　　Jacky又有Ｄ擔心咁話：「最衰頭先落黎果陣冇帶埋Ｄ錢，而家身上面得Ｄ散
紙……」

　　「妳咪旨意我呀！」雞雄見佢望住自己，當堂耍哂手話：「我搵勻成個銀包，
都係得舊幾水咋……」

　　「咁點算？」Jacky嘆左口氣。

　　「一係……返去囉……同妳老豆講和……」雞雄試探性咁提議：「橫掂而家
Carol都唔肯跟妳走咯……」

　　「唔得！」Jacky斬釘截鐵咁講：「一日未同我老豆講掂數，我都唔會返去……
而且我仲要親口聽到Carol同我講點解忽然間會改變主意？問佢係咪鍾意左第二個？
如果唔係，我點都唔會死心！」

　　「如果佢話係呢？」雞雄又試探咁問。

　　Jacky塊面即刻脹紅哂：「我一定會拎把刀去劈死果個撬我牆腳既仆街！」

　　「下？」雞雄當堂唔敢出聲，過左一陣，又怯怯咁話：「咁而家點呀？我想返
屋企呀。」因為佢個肚晌度打緊鼓。

　　「唔得！」Jacky又拉住佢。

　　「乜野呀？」雞雄想甩開佢隻手：「都唔關我事！」

　　「你以為我老豆會相信你咩？你之前同Carol一齊，而家又同我齊齊失蹤……」
Jacky冷笑住望實雞雄：「我老豆以前做乜野起家，你應該都聽過架啦……」

　　雞雄即刻諗返起陳大富後生果陣係黑幫大佬既江湖傳聞，個心當堂涼左半截……
即刻就苦埋泡腮：「唔係呀嘛？真係唔關我事架喎，我都係無辜辜畀妳拉左落水架
咋……」

　　Jacky仲冷笑咁話：「邊個叫你咁多事呀？總之而家你已經冇可能置身事外架
喇……」

　　「咁今晚點呀？」雞雄哭喪咁：「我飯都未食架？」

　　「我都唔知……最衰我地身上又冇錢……」Jacky個心都似乎好亂：「只有是
但搵個地方過一晚先，到左聽朝先再算……」

　　雞雄諗左一陣：「地方唔係冇，不過就屈質Ｄ……」

　　
-------------------------------------

　　「嘩！乜呢度咁臭架？」雞雄一打開度門，Jacky已經畀湧出黎果陣酸餿味薰
到幾乎想嘔咁滯。

　　雞雄一手推左佢入去：「將就下啦，依家著緊草呀，妳估係渡假咩？」

　　呢間其實係晌雞雄開工果間茶餐廳隔幾個舖位既一間吉舖。間舖已經吉左成年，
裡面冇水冇電，雞雄就整鬼壞左後門個門鎖，執乾淨左一個角落頭，鋪左Ｄ紙皮晌
地下當係蛇竇。平時出開去送外賣返黎，都會匿埋晌裡面蛇下王……

　　雞雄摸黑點著枝蠟燭，又放低Ｄ岩岩晌便利店買返黎果Ｄ麵包零食同埋野飲，
跟手坐低挨埋牆邊，向住仲企晌度猶疑緊坐唔坐低既Jacky話：「坐啦！妳唔係想
企成晚係嘛？」

　　「呢度咁污糟？」Jacky皺哂眉咁慢慢住低。點知一坐低就摸到Ｄ野，佢低頭
一睇，原來係本爛熔熔既「蛇貓狗」……中間仲夾住Ｄ黃琴琴，一陣除既廁紙……
當堂嚇到佢「哇」一聲彈開。

　　雞雄見佢個死樣，嘆左口大氣：「妳坐過黎呢邊啦！呢度我平時訓開，乾淨
Ｄ既……」

　　Jacky唯有死死地氣行埋黎，晌雞雄旁邊坐低，一面仲捏住個鼻話：「聽朝一
早我就會打電話搵個Friend借錢，到時……」

　　「到時咪畀個皇帝妳做囉！」雞雄一句窒過去：「過左今晚先講啦……拿，食
Ｄ野先啦，睇妳個樣都未食晚飯架啦？」自己已經搣開兩個麵包，大啖大啖咁塞入
口。

　　Jacky拎起個麵包咬左兩啖又放返低……

　　「乜野呀？」雞雄見佢咁，又潤佢：「好一餐唔好又一餐啦！唔通妳仲想好似
平時咁叫外賣都叫鮑魚撈麵咩？」

　　「唔係呀……我冇胃口，食唔落咋……」Jacky冇厘神氣咁。

　　「又掛住Carol牙？」

　　「嗯……」Jacky岳高頭望住個天花板，根本冇理雞雄：「佢依家應該晌屋企，
同爸爸媽媽好開心咁食緊晚飯……」

　　「妳冇野丫嘛？」雞雄見佢Ｄ表情古古怪怪咁。

　　「或者……」Jacky嘆左口氣，仲係冇理佢：「你講得岩……我真係唔應該咁
自私，拖埋佢落水……」

　　「妳……講乜野話？」

　　Jacky自言自語咁：「但係……我真係鍾意Carol架……點解……點解佢唔要
我？」

　　雞雄問左兩聲，見Jacky根本唔騷佢，都懶得再理佢，自顧自食飽個肚之後就
縮埋一二角大覺訓……

　　點知訓到半夜，雞雄忽然畀人嘈醒左，佢一擰轉身，憑著晌鋪面大閘Ｄ疏格
度透入黎果Ｄ街燈燈光，佢隱約見到Jacky訓左晌佢旁邊，成身不斷晌度震，又不
停咁細細聲唔知講緊Ｄ乜野。

　　「妳點呀？唔舒服牙？」雞雄有Ｄ擔心，於是扭著個電筒睇下，只見Jacky成
頭成面都係冷汗，於是膽粗粗伸手摸下佢個額頭……

　　嘩！勁辣手呀！Jacky原來發緊高燒！

-------------------------------------

　　（後話：雞雄幫左Jacky同Carol，不過畀佢地拖左落水……原來Jacky個老豆
「有底」架！呢下仲唔死？Jacky行藏暴露，迫住同雞雄走佬，淪落到要匿埋晌Ｄ
爛鬼空屋度過夜……而且，仲禍不單行，發埋燒添！雞雄今次都可算係拿屎上身
咯……下一集：「趁火打劫」……下？邊個？邊個趁火打劫？）

-------------------------------------

2010-3-11 12:45

快速回覆主題
標題:	(可選)
選項: 禁用 URL 識別禁用 Smilies 禁用 Discuz! 代碼使用個人簽名接收新回覆郵件通知	[完成後可按 Ctrl+Enter 發佈]